بائیڈن انتظامیہ روس میں فوج بھیج رہی نہ ہی یوکرین پر نو فلائی زون لاگو کر رہی ہے.امریکی وزیرخارجہ ان اقدامات سے سے ایٹمی طاقت کے ساتھ براہ راست تصادم ہو سکتا ہے‘ہم امریکا کو روس کے ساتھ براہ راست تنازع میں ڈالنے کا ارادہ نہیں رکھتے. انٹونی بلنکن کی امریکی نشریاتی اداروں سے گفتگو

  امریکی وزیر خارجہ انٹونی بلنکن نے کہا ہے کہ بائیڈن انتظامیہ روس میں فوج نہیں بھیج رہی اور نہ ہی یوکرین پر نو

 فلائی زون لاگو کر رہی ہے کیونکہ ایسا کرنے سے ایٹمی طاقت کے ساتھ براہ راست تصادم ہو سکتا ہے. رپورٹ کے مطابق مختلف امریکی ذرائع ابلاغ کو انٹرویو دیتے ہوئے انٹونی بلنکن نے وضاحت کی کہ نو فلائی زون کے لیے امریکا کو اسے سختی سے نافذ کرنے کی ضرورت ہوگی، جس میں یوکرین کے اوپر سے پرواز کرنے والے روسی طیاروں کو مار گرانا شامل ہو سکتا ہے.

این بی سی میٹ دی پریس پروگرام کو دیے گئے ایک انٹرویو میں انہوں نے کہا کہ امریکی صدر جو بائیڈن ایک چیز کے بارے میں بہت واضح رہے ہیں کہ ہم امریکا کو روس کے ساتھ براہ راست تنازع میں ڈالنے کا ارادہ نہیں رکھتے اور نہ ہی ہم نے ایسا کیا کہ یوکرین میں امریکی فوجی یا طیارے روسی طیاروں کے خلاف لڑ رہے ہوں. گزشتہ ہفتے یوکرین کے صدر ولادیمیر زیلنسکی نے نیٹو سے مطالبہ کیا کہ وہ روسی فوجی طیاروں کے خطرے سے نمٹنے کے لیے اپنے ملک پر نو فلائی زون نافذ کرے امریکا میں بھی متعدد قانون سازوں نے جوبائیڈن انتظامیہ سے یوکرین پر نو فلائی زون نافذ کرنے کا مطالبہ کیا ہے.

تاہم امریکا اور نیٹو نے واضح کیا کہ ان کا ایسا کرنے کا کوئی منصوبہ نہیں کیونکہ انہیں خدشہ ہے کہ اس سے روس کے ساتھ بڑے پیمانے پر جنگ چھڑ سکتی ہے، وائٹ ہاﺅس کی جانب سے بھی کہا گیا کہ ایسا اقدام زیر غور نہیں ہے. انٹونی بلنکن نے واضح طور پر اس بات کی جانب اشارہ کرتے ہوئے کہا کہ روس ایک ایٹمی طاقت ہے اور یہ بھی باعث تشویش ہے، صدر کی بھی ذمہ داری ہے کہ وہ ہمیں جوہری طاقت کے حامل روس کے ساتھ براہ راست تنازع اور جنگ میں نہ ڈالیں.

دریں اثنا واشنگٹن میں لٹویا کے وزیرخارجہ سے ملاقات کے بعد صحافیو ں سے گفتگو کرتے ہوئے امریکی وزیرخارجہ نے روس پر زور دیا کہ وہ یوکرین میں شہری آبادی کو نشانہ بنانے کا سلسلہ بند کر دے بلنکن کا کہنا تھا کہ لوگوں کو پرامن طور پر نکلنے دیں، ان تک دوائیں اور خوراک پہنچنے دیں اور یوکرین پر اپنی مرضی سے مسلط کی گئی اس جنگ کو ختم کر دیں.

امریکی وزیر خارجہ نے لٹویا میں اسرائیلی ہم منصب یائر لیپڈ سے ملاقات میں روس کے یوکرین پر حملے کے بعد کی صورتِ حال پر تبادلہ خیال کیا امریکی وزیرخارجہ نے یوکرین بحران کے خاتمے کے لیے اسرائیلی کاوشوں کی تعریف کی امریکی اور اسرائیلی وزرائے خارجہ کی ملاقات ایسے وقت ہوئی ہے جب اسرائیلی وزیرِ اعظم نفتالی بینیٹ نے روسی اور یوکرینی صدور سے رابطوں میں جنگ بندی پر زور دیا تھا.